Бүгүн Мындааба бөһүөлэгэр тыылга кыайыыны уһансыбыттар сквердэригэр Улуу Кыайыы күнүгэр аналлаах миитин буолла. «Барыта Кыайыы туһугар, барыта фронт туһугар» миитини арыйарга Мүрү нэһилиэгин баһылыга Прокопий Румянцевка тыл бэрилиннэ. Итиэннэ эҕэрдэ тылы улуус баһылыга Василий Алексеев, улуустааҕы бэтэрээннэр сэбиэттэрин бэрэссэдээтэлэ Иван Колодезников, Мүрү нэһилиэгин бочуоттаах олохтооҕо, үлэ бэтэрээнэ Василиса Вихрева эттилэр. Миитиҥҥэ үгүс кэнчээри ыччат кыттыбыта ордук суолталаах, үөрүүлээх буолла. Ол курдук Мындааба оскуолатын үөрэнээччилэрин таһынан улуустааҕы байыаннай-полевой хомуур оҕолоро кытыннылар. Ону тэҥэ Мындаабатааҕы «Кэнчээри» оҕо тэрилтэтин кырачааннара Кыайыыны уруйдуур хоһооннорунан чуопчаара эҕэрдэлээтилэр. Мындааба оскуолатын байыаннай кулуубун иитиллээччилэрэ сэрии толоонуттан эргиллибэтэх хорсун буойуттар, бу күҥҥэ тиийбэтэх сэрии, тыыл бэтэрээннэрин сырдык ааттарыгар сүгүрүйэн күөх веногу, оттон миитин кыттыылаахтара аалай сибэкки дьөрбөтүн уурдулар.
