Бүгүн анал байыаннай дьайыы кыттыылаахтарын уонна элбэх оҕолоох дьиэ кэргэттэр оҕолоругар аналлаах Мүрү нэһилиэгин дьаһалтатын харыйата буолла.
«Өркөн»киинигэр улууспут социальнай үлэһиттэрэ, уйулҕа киинин исписэлиистэрэ, эбии үөрэхтээһин педагогтара оҕолорго оонньуу, аралдьытыы тэрийэн сүргэни көтөҕө көрүстүлэр.
Үөрүүлээх чаас саҕаланан үүммүт саҥа дьылынан оҕолору Мүрү нэһилиэгин баһылыга Прокопий Румянцев, улуустааҕы нэһилиэнньэ социальнай көмүскэлин кэлим киинин дириэктэрэ Иннокентий Сергеев эҕэрдэлээтилэр. Тэрээһин сүрүн чааһыгар улуустааҕы оҕону чөлүгэр түһэрэр киин үлэһиттэрэ сэбиэскэй сойуус суруйааччыта Самуил Маршак “Двенадцать месяцев” остуоруйатыгар олоҕуран төрөөбүт кэрэкэ тылбытынан инсценировка оонньоон көрдөрбүттэрин оҕолор иһийэн олорон көрдүлэр.
Ону тэҥэ Е.Ф. Габышев аатынан Бороҕоннооҕу оҕо спортивнай оскуолатын «Энергия» үҥкүү бөлөҕө (сал. Туйаара Ларионова) «Валенки» үҥкүүлэринэн, “Тулуйхан” ырыа ансаамбыла “Дьүкээбил” ырыаларынан (сал. Евдокия Окоемова), сыл аайы элбэх утренниктары чуор куолаһынан киэргэтэр Кыыдаана Бочкарева «Саҥа дьыл»ырыатынан эҕэрдэлээтилэр.
Күүтүүлээх чаас үүнэн, Тымныы оҕонньор сиэнэ кыыһа Хаарчааналыын ыалдьыттаан, кэлбит оҕолорго минньигэс бэлэхтэрин ууннулар. Ол кэннэ, маскараат күрэһин кыайыылаахтарын бирииһинэн, кыттыылаахтары биһирэбил бирииһинэн наҕараадалаатылар.
Түмүккэ Дьокуускай куораттан ыҥырыылаах аниматордар оҕолорго бэһиэлэй оонньууну оонньоттулар, “Бумажное шоу” тэрийэн, көрү-нары көҕүлүттэн туттулар, чахчы, оҕо саас дьоллоох түгэнин бэлэхтээтилэр.
