Улууска доруобуйаларынан хааччахтаах дьоҥҥо аналлаах декада чэрчитинэн ахсынньы 8 күнүгэр Мүрү нэһилиэгин доруобуйаларынан хааччахтаах дьонугар аналлаах тэрээһин ыытылынна. Программа быһыытынан бастаан Сэһэн Ардьакыап аатынан улуус музейыгар сырыттылар, онтон Күлүмнүүр аатынан культура дыбарыаһыгар, С.Борогонскай аатынан киин библиотекаҕа экскурсиялаатылар,ыытыллар үлэни билистилэр.
Кэлбит ыалдьыттары Мүрү нэһилиэгин солбуйар баһылыга Вероника Сивцева, Мүрү нэһилиэгин инвалидтарын уопсустубатын салайааччыта Елена Попова уонна С.С.Васильев -Борогонскай аатынан киин библиотека директора Лена Павлова эҕэрдэлээтилэр. Дьон-сэргэ сөбүлүүр ырыаһыта Айаал Вырдылин музыкальнай эҕэрдэтин анаата. Тэрээһин аһыллыытын библиотекарь Сардаана Черкашина иилээн-саҕалаан ыытта.
Ол кэннэ библиотека специалистара өйү-санааны үлэлэтэр, моториканы дьарыктыыр оонньуулары бэлэмнээн, оонньотон ыалдьыттары сэргэхситтилэр. Көрсүһүү түмүгэр ыалдьыттар библиотекаттан кинигэ уларсан үөрэ-көтө дьиэлээтилэр.
