🌿Тапталлаах Мүрүбүтүгэр бэс ыйын 12 күнүгэр Үрүҥ тунах ыһыах ыһылынна. Айылҕабыт бу күн араас кэрэ көстүүлэри бэлэхтээн, дьоммут түөлбэлээн олорон, Алгыс Бүөтүр алгыһын ыллылар. Ыһыах үөрүүлээх чааһыгар нэһилиэк баһылыга Прокопий Румянцев бар дьонугар истиҥ эҕэрдэтин тиэртэ. Уйгулаах ыһыах ыалдьыттарынан улуус баһылыга Василий Аммосов, улуус дьокутааттарын Сэбиэтин бэрэссэдээтэлэ Иннокентий Аммосов буоллулар. Кэрэ-бэлиэ күҥҥэ нэһилиэкпит дьоһун дьоно наҕараадалары туттулар.
🌿Түөлбэлэринэн түһүлгэлэнэн олорбут нэһилиэк олохтоохторун баһылык быырпаҕынан, ис миининэн, биэ этининэн, хартанан күндүлээтэ.
🌿Ыһыах сонун күрэхтэринэн “Күүстээх Куо-2024” диэн Варвара Васильева – Күүстээх Баттаайа аатынан күүстээх кыргыттарга, кырачаан уолаттарга “Ылгын боотур” буоллулар. Дьон болҕомтолорун тардар “Мүрү боотура” күүстээхтэр күрэстэрэ, ону таһынан дьиэ кэргэн сылынан уһун суһуохтаах кэрэ Далбардар күрэстэрэ, саха таҥаһын уонна оҕолорго ырыа күрэстэрэ буолан аастылар 👏
