Дьиэ кэргэн сылыгар анаммыт уһун суһуохтаахтар куонкурстарыгар түөрт дьиэ кэргэн кытынна. Ол курдук Мындаабаттан түөрт көлүөнэ – эбэ, ийэ, кыыс, сиэн кыыс –Матрена Заболоцкая сиэнинээн Динаралыын, Анастасия Портнягина сиэнинээн Ангелина Ушницкаялыын мустубут көрөөччүлэри сөхтөрдүлэр. Эбэлэрэ 13 тутум уһун суһуоҕун баччааҥҥа диэри налыта сылдьара үгүс дьоҥҥо кэрэ көстүү буолан соһутта.
Атын кыттааччылар – Екатерина, Сандаара Жирковалар, Снежана, Милена Максимовалар, Уһун Күөлтэн Моника, Дайна Куприяновалар эмиэ саха кыыһын уһун суһуохтаах кэрэ таһаатын көрдөрдүлэр.
Ыһыах уһун суһуохтаах дьиэ кэргэнинэн Мындаабаттан Матрена Заболоцкая дьиэ кэргэнэ ааттанан сыаналаах бирииһинэн бэлиэтэннилэр.
«Самаан сайын иэйиилээх ырыалара» диэн ылбаҕай ырыа куонкуруһа оскуола үөрэнээччилэрин ортолоругар тэрилиннэ. Манна саҥа тахсан эрэр талааннар Айсен Кутуков, Намыына Бурцева, Ксения Охлопкова, Олеся Крылова, Виолетта Колесова ылбаҕай ырыаларын бэлэхтээтилэр.
Саха таҥаһын көрүү күрэскэ Мындаабаттан Сивцевтэр, Андросовтар, Уйгулаана Олесова кыыһынан кытыннылар. Иистэнэр талааннаах ийэлэр бэйэлэрин иистэрин көрдөрөн, бастакы оҥоһуктарын бэлэхтээтилэр.
✅ @uamurusahargata @ulusmedia
