Тэрээһин үөрүүлээх чааһын Мүрү нэһилиэгин талааннаах дьоно, ол курдук «Кэнчээри» образцовай оҕо ырыа- үҥкүү коллектива (сал. Ноговицына У.П.), «Күндүүнэ» ветераннар ансамбыллара (сал. Петрова О.С.), «Күндүйэ» үҥкүү коллективын үҥкүүһүттэрэ Корякина А.А., Аммосова Е.Т. (сал. Фомина М.С.), талааннаах ырыаһыттарбыт Елена Жиганюк, Айаал Вырдылин, Иван Прибылых, Юрий Стручков, Лена Протопопова, Мындааба орто оскуолатын үөрэнээччилэрэ Уйгулаана Крылова, Күннэй Гоголева (сал. Павлова Д.И.) киэргэттилэр.
Мүрү нэһилиэгин баһылыгын солбуйааччыта Сивцева В.П. иһирэх эҕэрдэтин бар дьонугар тиэртэ, нэһилиэк социальнай экономическай сайдыытыгар киллэрбит кылаатын иһин анал бэлиэни үлэ ветераныгар, Ситим түөлбэ активиһыгар Иннокентьев Егор Петровичка туттарда.
Бу күн үгэс буолбут араас күрэхтэр ыытылыннылар. Ол курдук, тэрилтэлэр, түмсүүлэр «В гостях у самовара» күрэххэ кыттан самовар эгэлгэтин уурдулар, блины арааһын тэниттилэр. Түмүккэ, «Күндүүнэ» түмсүү 1-кы, Мүрүтээҕи эдэр натуралистар станцияларын коллектива 2-с, Мындааба пенсионердарын түмсүүлэрэ 3-с миэстэлэри ыланнар үөрүүлэрэ үксээтэ. Улуустааҕы сокуоннай саастарын ситэ илик оҕолору чөлүгэр түһэрэр киин коллектива, «Дьүөгэлэр» Киин түөлбэ иһинэн түмсүү, «Умсулҕан» коллекционердар түмсүүлэрэ анал бириистэринэн биһирэннилэр.
Частушка толоруутугар 1-кы миэстэни «Күндүүнэ» түмсүү, 2-с — Улуустааҕы сокуоннай саастарын ситэ илик оҕолору чөлүгэр түһэрэр киин коллектива, 3-с Мындааба пенсионердарын түмсүүлэрэ ыллылар. Анал бириис туттарыллынна «Умсулҕан» коллекционердарыгар.
Саамай күүтүүлээх күрэхтэргэ: «Бой с подушками» Никон Васильев, «Петушиные бои» Михаил Макеев, «Хаатыҥка быраҕыыта» Алексей Васильев, ону таһынан көрдөөх эстафетаҕа Владимир Копырин, Анатолий Алексеев, канат тардыһыытыгар тута хомуллубут хамаанда хамандыыра Дмитрий Иванов кыайыылаахтарынан буоллулар.
«Остуолбаҕа ыттыы» күрэххэ тэрээһин устата түөрт төгүл үрдэлгэ ыттан кыайыылааҕынан буолла Данилов Арсен. Маннык түгэн маҥнайгытын буолан дьону-сэргэни кэрэхсэттэ, долгутта.
Тэрээһин кэмигэр «Дьол уйата» элбэх оҕолоох ийэлэр түмсүүлэрэ (сал.Горохова Т.Н.) баҕа өттүлэринэн итии аһынан күндүлээтилэр, олохтоохтор атыы-тутуу дьаарбаҥкатын тэрийэннэр сааскы бырааһынньыгы ситэрэн биэрдиллэр.
Кыһыны атаарыы, сандал сааһы көрсүү бүгүҥҥү тэрээһини ыытыыга көмөлөспүт биирдиилээн дьоннорбутугар олохтоох дьаһалта аатыттан махталбытын тиэрдэбит.
Инникитин бу курдук түмсүүнэн сайдыыга, үлэнэн үрдэлгэ иннибит диэки баран иһиэххэ. Баҕарабыт дьоллоох, эйэлээх олоҕу, чэгиэн доруобуйаны.
