Кулун тутар 12 күнүгэр Мындааба кулуубар сандал сааһы көрсө «Эбээ мичээрэ» күрэх тэрилиннэ. Күрэххэ общественнай олоххо көхтөөх далбар хотуттар Бороҕонтон, Мындаабаттан кытыннылар. Күрэх биэс түһүмэхтээх: бэйэни билиһиннэрии, биир суол сөбүлүүр бүлүүдэни дьиэҕэ астаан аҕалан көрдөрүү, «Мин дьиэ кэргэним Аҕа дойду Улуу сэриитин сылларыгар» диэн темаҕа дьиэ кэргэн, чугас аймах дьон сэрии кэмигэр олохторун сырдатыы, » Эдэр сааһы эргитэн» 70-с, 80-с сыллардаах ретро-дефиле уонна » Талба талаан » диэн кыттааччылар талааннарын, дьоҕурдарын, интириэстэрин көрдөрөр түһүмэх.
Түһүмэхтэр быыстарыгар эр дьон кэрэ аҥардарга музыкальнай эҕэрдэлэрин бэлэхтээтилэр.
Дьүүллүүр сүбэ быһаарыытынан түмүккэ » Талба талаан» анал аат Варвара Кривошапкинаҕа иҥэрилиннэ. Бастакы миэстэ Матрена Москвитина, иккис — Лидия Лугинова, үһүс миэстэ Валентина Кириллова буоллулар. Кыттааччыларга дипломнар уонна сыаналаах бириистэр туттарылыннылар. Конкурсант эбээлэргэ оҕолоро, дьүөгэлэрэ, түмсүүлэрэ бырааһынньыгынан эҕэрдэлээн сибэкки дьөрбөлөрүн, бэлэхтэри биэрдилэр.
» Эбээ мичээрэ» күрэх ыытыллыытыгар анал бириистэри олохтообут партнердарбытыгар» Сайдам» маҕаһыыҥҥа ( салай. В. Д. Петров), улуустааҕы социальнай уонна ыччат политикатын управлениетыгар ( салай. В. И. Андросова) махталбытын тиэрдэбит.
