Ыам ыйын 7 күнүгэр Мүрү нэһилиэгин Мындааба бөһүөлэгэр оройуон бастакы механизатора Р.Н.Дьяконов аатынан «Кинилэр Кыайыыны уһансыбыттара» Трактористар сквердэригэр МТСка үлэлээбит сэрии уонна тыыл ветераннарын ааттара памятникка эбии суруллан үйэтитиллэр миитини Мүрү нэһилиэгин дьаһалтата, «Мындааба» сынньалаҥ киинэ, общественность тэрийэн ыыттылар. Өйдөбүнньүк мемориальнай дуоскаларга Аҕа дойду Улуу сэриитин ветераннара Семен Семенович Копырин, Иннокентий Николаевич Аммосов, тыыл ветераннара Степанова-Аммосова Мария Иннокентьевна, Гоголева Дария Иннокентьевна, Заровняев Василий Сергеевич, Шепелев Петр Гаврильевич, Петухов Роман Семенович, Степанов Семен Александрович сырдык ааттара үрүҥ көмүс буукубанан суруллан үйэтилиннилэр. Кэриэстэбил миитинигэр «Мүрү нэһилиэгэ» тыа сирин түөлбэтин дьаһалтатын баһылыга Прокопий Румянцев, Уус-Алдан улууһун ветеран Сэбиэтин председателэ Олег Федоров тыл эттилэр. Аймахтар ааттарыттан харда тылы сэрии кыттыылааҕа Семен Семенович Копырин сиэнэ Петр Иванов эттэ. Мындааба олохтоохторо бу тэрээһиҥҥэ кыралыын-улаханныын кыттыыны ылбыттара албан ааттаах ааспыт көлүөнэ дьону ытыктыылларын, кэриэстииллэрин, Улуу Кыайыы өрөгөйдөөх үбүлүөйүн суолтатын өйдүүллэрин, үрдүктүк туталларын көрдөрдө.
Миитин кэнниттэн кулуупка Кыайыы күнүн көрсөр үөрүүлээх тэрээһин буолла. Ветераннар уонна бочуоттаах сынньалаҥҥа олорор пенсионердар итии чэйдээх остуол тула олорон Кыайыы күнүнэн эҕэрдэлэстилэр, ыллаатылар-туойдулар. Эҕэрдэ кэнсиэргэ Мындааба уус-уран самодеятельноһын кыттыылаахтарын кытта ырыаһыттар Елена Жиганюк, Николай Бурцев, Иван Прибылых, эдэр ырыаһыттар Кыыдаана, Уйгулаана Бочкаревалар ылбаҕай ырыаларын бэлэхтээтилэр.
Мындааба ветераннарын Сэбиэтин председателэ Лидия Лугинова саҥа састаабы кытта билиһиннэрдэ, олохтоохтору эҕэрдэлээтэ.
