Ыам ыйын 13 күнүгэр Мындааба сынньалаҥ киинигэр оскуола үөрэнээччилэригэр Кыайыыга анаммыт хоһооннору уус-ураннык ааҕыыга күрэх буолла. Күрэҕи Мүрү нэһилиэгин тыа сирин түөлбэтин дьаһалтата ( баһылык П. Ф. Румянцев), «Мындааба» сынньалаҥ киинэ ( директор В.В. Колесова), Мындааба спортивнай хайысхалаах орто оскуолата (директор эбээһинэһин толорооччу А. Е. Егоров) тэрийэн ыыттылар. Дьүүллүүр сүбэ Улуу Кыайыыга анаммыт хоһоон күрэҕин кыттааччыларын үс бөлөххө арааран көрдө: бастакы сүһүөх 1-4 кылаас үөрэнээччилэрэ, иккис бөлөх 5-8 кылаастар уонна үрдүкү 9-11 кылаастар.
Түмүккэ бастакы бөлөххө 1 миэстэни Ньургуйаана Гоголева (3 кылаас, Мындааба оскуолата, салайааччы Галина Бурнашева); иккис миэстэни Ларион Ларионов ( 3 кылаас, Мүрү 1 нүөмэрдээх оскуолата, салайааччылар Евдокия Васильева, Екатерина Парникова) уонна Давид Бурнашев ( 2 кылаас, Мүрү 1 нүөмэрдээх орто оскуолата, салайааччы Елена Атласова); үһүс миэстэни Шелковников Дыгын ( 3 кылаас, Мүрү 1 нүөмэрдээх оскуолата, салайааччы Евдокия Васильева) ыллылар. Иккис бөлөххө бастакы миэстэ Алексеева Карина ( 7 кылаас, Мүрү 2 нүөмэрдээх оскуолата, салайааччы Саргылаана Бурцева); иккис миэстэ Арылхан Аржаков ( 7 кылаас, Мындааба спортивнай хайысхалаах орто оскуолата, салайааччы Нюрбина Васильева) уонна Анжелика Ховрова ( 6 кылаас, Мүрү 1 нүөмэрдээх оскуолата, салайааччы Екатерина Парникова); үһүс миэстэ Полина Культертинова ( 7 кылаас, Мындааба оскуолата, салайааччы Мария Аржакова) буоллулар. Улахан кылаастарга Мындааба оскуолатын 9 кылааһын үөрэнээччитэ Сааскылаана Решетникова ( салайааччы Прасковья Третьякова) соҕотоҕун кытынна уонна 1 миэстэни ылла.
Дьүүллүүр сүбэ быһаарыытынан, Мүрү 1 нүөмэрдээх орто оскуолатын үөрэнээччилэрэ Артем Губарев (2 кылаас, салайааччы Елена Атласова) » Самый юный исполнитель» уонна Сережа Васильев ( 5 кылаас, салайааччы Мария Аммосова) «За артистизм исполнения» анал ааттар хаһаайыннарынан буоллулар. » За самое проникновенное исполнение» номинация Рощин Сайааҥҥа ( 6 кылаас, салайааччы Нюрбина Васильева) ананна. Уус-уран ааҕыы кыайыылаахтара уонна номинаннара анал дипломнарынан уонна сыаналаах сертификаттарынан наҕараадаланнылар. Дьүүллүүр сүбэҕэ үлэ ветерана, Мүрү нэһилиэгин Бочуоттаах олохтооҕо Екатерина Неустроева, Мындааба спортивнай хайысхалаах орто оскуолатын педагог-библиотекара Мария Березкина уонна Мындааба СК директора Владилена Колесова үлэлээтилэр.
