Балаҕан ыйын 15 күнүгэр Мүрү нэһилиэгэр «Майаҕатта Бэрт Хара» стадиоҥҥа сүүрүү-хаамыы декадатын үөрүүлээх аһыллыыта буолла. Бу маннык декада аан бастаан 1999 сыллаахха Мындааба спортивнай хайысхалаах оскуола учууталлара Варвара Копырина, Зинаида Афанасьева көҕүлээһиннэринэн ыытыллыбыта.
Үөрүүлээх тэрээһиҥҥэ спортсменнары, үөрэнээччилэри, төрөппүттэри Мүрү нэһилиэгин дьаһалтатын баһылыгын солбуйааччы Вероника Сивцева, Бороҕоннооҕу оҕо спорт оскуолатын директора Михаил Слепцов декада аһыллыытынан эҕэрдэлээтилэр.
Туйаара Ларионова салайар «Энергия» үҥкүү коллектива аэробика көрдөрөн тэрээһини киэргэттилэр, улуус биллэр ырыаһыта Айаал Вырдылин ырыанан эҕэрдэтин тириэртэ.
Ол кэннэ спорт оскуолатын чэпчэки атлетикаҕа тренерэ Мария Слепцова эти-хааны чэбдигирдэр дьарыгы оҥордо. Сүүрүү-хаамыы декадатын кыттыылаахтара бары биир киһи курдук зарядка оҥордулар.
Дьэ ити кэннэ стадион туонатын сүүрэр суолугар маассабай сүүрүү көрүөхтэн кэрэ көстүү буолла.
Үөрүүлээх тэрээһини ыытта Мындааба уус-уран самодеятельноһын кыттыылааҕа Павел Москвитин.
