Бүгүн муус устар 11 күнүгэр «Мындаба» сынньалаҥ киинигэр наставникпыт, РСФСР уонна Саха Республикатын үөрэҕириитин туйгуна, Мүрү нэһилиэгин бочуоттаах олохтооҕо, педагогическай үлэ ветерана Андросова Людмила Афанасьевнаны кытта истиҥ көрсүһүү буолла. Көрсүһүүгэ Мүрү нэһилиэгин дьаһалтатыттан баһылык солбуйааччыта Румянцев Прокопий Федотович, тэрилтэ салайааччылара уонна общественность кыттыыны ыллылар. Людмила Афанасьевна наставник буоларын быһыытынан үөрэхтээһиҥҥэ, оҕону иитиигэ уонна общественнай хамсааһыҥҥа үгүс элбэх сүбэни биэрдэ. Ону тэҥэ «Мындааба инникитэ» проегын былаанын билиһиннэрдэ. Бу проект сүрүн соруга Мындаабаттан төрүттээх, үлэһит буолбут ыччаттарбыт дойдуларын кытта ситимнэрин быспакка, куруук күүс- көмө, бииргэ буолалларыгар диэн эттэ. Проект чэрчитинэн Мындаабаҕа уонна Дьокуускайга Мындааба күннэрин тэрийэргэ диэн этиини олохтоох дьаһалта , общественность өттүттэн өйөбүлү ылла. Бу проект быйыл Россияҕа Педагог уонна Наставник, республикаҕа Үлэ, Мүрү нэһилиэгэр Аҕа сылларыгар үтүө тэрээһин буолан дьон сэҥээриитин ылыа диэн эрэнэбит.
